Canada ram kang vangin mi tam tak sawn chhuak

Canada khawthlang lam, Manitoba province-ah ram nasa taka a kan avangin a chhehvela chengte chu sipai aircraft leh helicopter hmangin sawn chhuah an ni.

Khua a ro leh lum avangin kangmei hi a kangkai chak hle a, hmun 180 chuangah kangmei hi a chhuak tawh niin official-te chuan an sawi. Canada ram bakah US hmun ṭhenkhatah pawh a kangkai tawh a ni.

Saskatchewan leh Manitoba ah emergency an puang tawh a, ram kang ṭhelhpui turin ram dangte puihna pawh an ngen tawh bawk.

Canadian Armed Forces, Manitoba Wildfire Service leh Manitoba Havy Urban Search and Rescue Team chuan kangṭhelh hna leh, mipuite sawn chhuah hna hi an thawk mek. Mi 5,000 chenna, Flin Flon khuaa chengte chu sawn chhuah vek ni tawhin kangṭhelhtu pawl leh anmahni puitute chauh an awm tawh. Pukatawagan khua aṭangin mi 2,000 sawn chhuah ngai an la awm tih an sawi.

Manitoba province-ah hian hmun 25-ah ram a kang a, a tam zawk hi thunun thei tawh a, mahse hmun 10 ami chu thunun theih a la nih loh thu an tarlang. Kum 2023-ah khan Canada hian ram kan nasat ber ṭum tuarin, ram acre mtd 42 chuanga zau a kang a ni.