Hamas-in US rawtna siamṭhat an phût

US-in Gaza Strip-a inkahhai puanna tura rawtna a siam chu Israel-in an pawm tawh nia sawi a nih hnuah, Hamas lam chuan a ṭhenkhat siam danglam turin an phût.

Hamas chuan US rawtna siam hi a ngaihtuah hnuah, an mi hren mek zinga Israel mi nungdama la awm 10 bakah, thi tawh ruang 18 te hlan chu Israel jail-a tang mek, Palestinian mi eng emaw zat thlengna atan hlan a remti dawn tih a sawi. Hemi rual hian rawtna siam ṭhenkhat erawh siamṭhat a phût thung a ni.

Gaza Strip-a inremna tluantling siam an phut thu sawiin, Hamas chuan Israel sipaite hnukdawk a, chhawmdawlna thawn luh pawh khaihlak awm loa luh tir an phût. Hengte hi US ruahmanna siamah hian a tel lo tih an sawi. An thil phut chungchang hi Middle East-a US president Donald Trump special envoy, Steve Witkoff hnenah an hlan.

Witkoff pawhin Hamas chhanna hi a dawn tawh thu a sawi a, mahse an thil phût hi pawmsak vek theih a nih loh thu a tarlang. Hamas chuan an ruahmanna siam chu pawm phawt sela a duh thu sawiin, "Hei hi ni 60 chhung inkahhai puan a nih thuai theihna tura inremna siam theihna awmchhun a ni," a ti.

Israel prime minister Benjamin Netanyahu office chuan thuchhuah siamin, US rawtna siamte Israel-in a pawmpui laiin, Hamas erawh chuan an lo hnial zel niin a sawi.

US rawtna siam hi kimchangin puanzar a ni lo a, mahse a pawimawh zual an tarlan zingah Gaza Strip-a ni 60 inkahhai puan, inremna siam kar khatnaah Hamas-in an mi hren mek, Israel mi nungdama la awm leh thi tawh ruang 28 Israel kuta a hlan leh, a hnuah mi dang 30 chhuah, Israel jail-a tang mek Palestinian mi 1,236-te chhuah leh, thi tawh ruang 180 te Hamas kut hlan bakah, UN leh agency dang kaltlanga Gaza-a chhawmdawlna thawn luh tihte a tel.

He ruahmanna hi Israel-in a pawm hnuah Hamas hnenah hriattir ve leh a ni a, mahse Hamas lam hian siamṭhat an duh thung. Mahse Israel PM hian Hamas phut anga siam danglam erawh a pawm a rinawm lo. Netanyahu chuan Hamas-ten an ralthuamte an dah a, Hamas kaihhruai sorkar tih tawp leh, an hruaituten Gaza an chhuahsan hunah Gaza-a indona chu a tawp thei ang, tiin a sawi.