Japan-in Bangladesh puihna USD tld 1.06 pe dawn

Japan chuan Bangladesh ram dinhmun siamṭhatna turin USD tld 1.063 a pe dawn tih Bangladesh sorkar lailawk hruaitu, Muhammad Yunus chuan nimin khan a sawi.

Chief adviser Yunus chu Japan nena an inlaichinna tih chak dan ngaihtuahin Japan ramah a zin a ni. Nimin khan Tokyo-ah Japan prime minister Shigeru Ishiba nen an inkawm a, meeting zawha press conference a neihah, Yunus chuan Japan-in an ram puihna a pek turah hian economy siamṭhatna tura development policy loan, USD mtd 418 pawh a tel tih a tarlang.

USD mtd 641 chu railway line tih changtlunna turin hman a ni dawn a, Japan hian Bangladesh zirlaite scholarship atan USD mtd 4.2 a pe bawk a ni, a ti.

Yunus hi ni li cham turin a zin a, 30th Nikkei Forum Future of Asia-ah a tel nghal ang. Japan PM nena an inkawmnaah hian kawng hrang hranga ram pahnihte thawh dunna tih nghet dante sawiin thawhdunna tur inremna pawh an ziak thar bawk. PM Shigeru pawhin Yunus kaihhruai Bangladesh sorkar lailawkin an ram siamṭhatna tura hma a lakna hrang hrang chu Japan chuan a thlawp thu a sawi ve bawk.