France-in vantlang hmuna mei zuk khap dawn

France chuan vantlang hmun, naupangten an tlawh fo hmuna mei zuk a khap dawn. He khapna hi July 1, 2025 aṭanga hman tan tur a ni dawn a; beach, park, public garden, school chhehvel, bus stop leh infiamna hmunhma te a huam ang.

Health and family minister Catherine Vautrin chuan naupangte awmna hmunah vaihlo leh a kaihhnawihte tih bo vek a ngaia ni tiin, he khapna dan bawhchhiate chu USD 153 zel chawi tir an ni dawn tih a sawi. Khapna hian cafe leh bar outdoor area te a huam dawn lo thung.

Vautrin chuan mei zuk khapna hi khauh taka kenkawh a ni dawn a, police-te pawh uluk taka an duty tur thu a sawi rualin, dan zawm tura mahni inthunun ṭheuh a pawimawh thu a sawi.

Mei zuk khapna hian electronic cigarrete a huam tel dawn lo a,mahse hengah pawh hian nicotine awm thei zat tur bithliah tum a nih thu Minister chuan a sawi bawk. French Monitoring Centre for Drugs and Drug Addiction in a tarlan danin, an ram mipui zinga 23.1% chu nitina mei zu ṭhin niin a hniam lai ber a ni thung a, kum 2014 record aiin point nga chuangin a hniam tawh.

National Committee Against Smoking chuan kumtin vaihlo leh a kaihhnawih vangin mei zu mi 75,000 chuang an thi tih sawiin, hei hian an rama kum khata mitthi awm zat aṭanga 13% vel an tling pha a ni. Kum 2008 aṭang khan France hian restaurant leh nightclub-ahte mei zuk a lo khap tawh a, kum 2024 aṭangin beach, park leh vantlang hmuna khap tum ni mah se dan siam a ni mai lo. Heti chung hian municipality 1,500 chuang chuan an bial chhunga vantlang hmun hrang hrangah mei zuk hi an lo khap tawh a ni.

France cancer association, La Ligue Contre le Cancer in tun hnaia report a tih chhuahah, France mipui 80% dawn chuan vantlang hmuna mei zuk khap hi an thlawp a ni.