Malaysia-in inkahhai pawhsei turin Myanmar nawr

Association of Southeast Asian Nations (ASEAN) chair hna chelh mek, Malaysia chuan Myanmar sipai sorkar leh helpawlten inkahhai an puan chu pawhsei turin a nawr. Lirnghing na tak an tawrh hnuah, harsatna tawkte chhawmdawl hna thawh a nih theihna atan helpawl leh sipai sorkarin inkahhai an puan chu May thla tawpah tawp tawh dawn a ni.

Pathianni khan Kuala Lumpur-ah ASEAN foreign minister meeting neih a ni a, nimin khan ASEAN summit neih chhunzawm a ni nghal bawk. Malaysia foreign minister Mohamad Hasan chuan Myanmar-a pawl hrang hrangte chuan a inepna te tih tawp a, lirnghing leh tualchhung buaina thleng avanga harsatna tawk mipuite chhawdawlna hna leh an ram din thar hna thawh chhunzawm a nih theihna atan inkahhai pawtsei tura an ngen thu a sawi. Inkahhai chu lir nghinna bial chhungah chauh ni lo, a pawn lamah pawh puang turin a ngen.

Kum 2021 February thlaa Myanmar sipaiten an rama civil sorkar hnehchhuh a, thuneihna an chan hnuah ram chhunga buaina nasa tak a la thleng chhunzawm reng a ni. ASEAN chuan an member, Myanmar ram buaina tih tawp leh muanna a awm theihna turin hma a la a, inremna siamna tur point panga an siam chu Myanmar sipai sorkar hian a zawm loh avangin annual meeting-ah sipai hotute hi telh an ni ta lo a ni.