Buhfai a lei ngai loh thu sawitu Japan Minister a bang

Japan agriculture minister, Taku Eto chu amah thlawptuten thilpek atan buhfai an pek ṭhin avanga a lei ve ngai loh thu a sawi avangin minister a nihna aṭangin a ban phah.

Japan ramah buhfai man to chhoh mek leh, buhfai supply a tam loh avanga mipui an phun mek laia Pathiannia Liberal Democratic Party seminar neiha Minister thusawi hi an helh hlawm hle a ni. Sawiselna a tawh nasat avangin Eto chuan nimin khan prime minister Shigeru Ishiba hnenah banna a theh lut ta a ni. Eto hi nikum October thlaa PM atana lak luh, Ishiba kaihhruai sorkar hnuaia minister bang hmasa ber a ni.

Eto chuan PM office-a banna a thehluh hnuah, an rama buhfai man sang avanga mipuiten harsatna an tawh mek laia thil awm lo tak a lo sawi avang chuan pawi a tih thu a sawi. Hemi rual hian thilpek atana a dawn buhfai chu white rice ni loin brown rice a nih thu a sawi a, hetiang hi man pawh a ziaawm zawk avangin mipui pawhin ngaihven se a duh niin a tarlang.

PM Ishiba chuan Eto thlak tur hian agriculture leh fishery policy lama tawnhriat ṭha tak lo nei tawh, environment minister hlui Shinjiro Koizumi chu a ruat nghal. Koizumi hi buhfai supply a kal tluan leh, a man sang zel tur venna kawnga hma la nghal tura hriattir a ni bawk.

Nikum August thlaa sorkarin lirnghing na tak thleng thei laka inbuatsaih tura mipuite a hriattir hnuah, buhfai leh ei tur dangte pawh tam tak lei khawlin hei vang hian supply lam indaih lohna a thlen phah a ni. Buh an thar leh hnuah supply hi rawn ziaawm mah se, kum dang anga an thar tam loh bakah a man a rawn pung chho leh abwk. Official-te buh thar tlem chhan hi khaw lum lutuk vang niin an puh a, mahse expert-te chuan sorkar policy fuh tawk loh vangin an sawi ve thung.