Sri Lanka bus driver-te AI hmangin vil dawn

Sri Lanka sorkar chuan Pathiannia Kotmale tlangdunga bus chetsualna thlenga mi 23 an thih hnuah, bus driver-te chu artificial intelligence hmanga vil reng an nih tawh tur thu leh, public transport-ah seat belt hmang ngei ngei tura thupek tih chhuah a nih tur thu a sawi.

Pathiannia chetsualna thleng kha kum 20 chhunga Sri Lanka-a bus chetsualna thleng rapthlak ber a ni. An ramah hian motor chetsualna a thleng ngun hle a, kumtin motor chetsualna thlenga thi hi mi 3,000 vel an tling ṭhin.

Transport minister Bimal Rathnayake chuan June thla aṭangin public transport-a seat belh hman vekna tur thupek tih chhuah a ni dawn a, nakkum aṭangin driver monitoring system chu hman ṭan a ni dawn bawk tih a sawi. He ruahmanna hi motor khalhtute fimkhurna tur leh, chetsualna thleng ṭhin venna tur atana tih a nih thu a sawi. AI-backed driver observation system chu bus tinah dah vek turin an ti dawn a, hei bakah truck-ah pawh dah tir tum a ni bawk a ni, a ti.

Kotmale-a Buddhist biakina kal phurtu bus chesualah khan mi 23 an thih bakah hliam tuar 54 an awm. Driver chuan an tlan chhuah hma ni hian bus steering wheel-ah harsatna a awm nia a lo sawi tawh thu report a ni. Bus chesualah hian mi 77 an chuang a, hei hi chuang thei zat bituk aiin 20 in an tam a ni.