Ukraine nena inbiaknaah Putin a tel dawn lo

Russia president Vladimir Putin chuan Ukraine nena an buaina chinfel dan ngaihtuaha inbiakna neih a rawt hnuah, Turkey khawpui Instanbul-a inbiakna neih turah hian amah chu a tel dawn lo thung.

Kar liam ta khan President Putin-a'n inbiakna neih a rawt khan meeting-ah amah ngei a tel dawn leh dawn loh hi a sawichiang lo a, Ukraine president Volodymyr Zelenskyy chuan Putin a tel dawn chuan amah ngei a tel tur thu pawh a sawi a ni.

Russia-in Ukraine nena inbiakna neih tura an ram aiawh turte hming a tarlanah President Putin hi a lang lo. Russia aiawh tur zingah hian a hmaa inbiakna neiha lo tel tawh pahnih, presidential adviser Vladimir Medinsky leh deputy defence minister Alexander Fomin pawh an tel leh. Anni bakah Russia foreign military agency, GRU-a main intelligence directorate-a director Igor Kostyokov bakah deputy foreign minister Mikhail Galuzin te pawh an tel.

Russia-in Ukraine a run tirh lam, kum 2022 khan mi dang kaltlang loin Russia leh Ukraine palaite hi Belarus leh Turkey-ah an lo inbe tawh a, mahse inremna an siam thei lo a ni. Hemi hnuah ram pahnihte hian mi dang kaltlang lo, direct-a inbiakna an nei zui tawh rih lo a ni.