US thlawp aid group-in Gaza-ah luh an tum

US thlawp aid group, Gaza Humanitarian Group (GHF) chuan May thla tawp lamah Gaza Strip-ah chhawmdawl hna thawk tura luh an tum thu an sawi.

Kum 2023 October thlaa Gaza Strip-a Israel-Hamas indona thlen aṭang khan mipuite ei tur sem leh chhawmdawl hna hi international aid group leh UN organisation-ten an thawk a ni. Kumin kumtir lama Israel-Hamas te inkahhai puan a tawp hnuah, March 2 aṭang khan Israel chuan Gaza luhka te dang vekin, chhawmdawlna pawh thawn luh a ni tawh rih lo a, hei vang hian Gaza a cheng mi nuai tel chu ei tur khamkhawp nei loin an awm tawh nia sawi a ni. Hetih lai hian Israel chuan mipui ei tur leh mamawh dang thawnluhte chu Hamas ten an lo ruksak ṭhin niin a puh thung.

Kumin kumtir lama din, GHF hi US president Donald Trump kaihhruai sorkar pawhin a thlawp a ni. Mahse Gaza-a chhawmdawlna sem danah Israel-in kaihhruaina khauh tak a siam avanign international orgnisation tam tak chuan an thawhpui duh lo a ni.

UN hnuaia aid organisation te pawhin GHF hmalakna hi an zawm dawn lo tih an lo sawi tawh a, American security firm UG Solutions leh Safe Reach Solutions erawh chuan an thawhpui dawn tih an sawi tawh thung a ni.

Israel hian Gaza chhim lamah mipuite mamawh thil sem chhuahna tur hmun, “Safe Distribution Sites” (SDSs) hi pali chauh a siam a, mahse GHF chuan siam belh tura an ngenna chu Israel pawhin a pawmsak tawh tih an sawi. SDS siam belh tur zat sawilan a la ni lo.