US-in Saudi Arabia hnenah ralthuam USD tld 142 man lei tir remti

United States chuan Saudi Arabia hnenah ralthuam, USD tld 142 dawn chu lei tir a remti tih Thawhlehni khan White House chuan a puang a, defence lama inremna an siampui lian ber a nih thu a sawi bawk.

Inremna hi Saudi Arabia tlawha zin, US president Donald Trump leh Saudi Crown prince Mohammed bin Salman-ten Thawhlehni khan Saudi khawpui, Riyadh ah an ziak a ni. US president hlui, Joe Biden hunlai khan Saudi nen hian defence deal hi siam tum ni mah se an ti hlawhtling thei lo a ni.

White House chuan inremna siamah, Saudi-in ralthuam a lei tur zingah hian Lockheed's F-35 jet a tel leh tel loh erawh a tarlang lo. Military aircraft hi Saudi Arabia hian kum eng emaw chen chu lei a lo duh tawh a ni. US hian a phalsak a nih chuan Middle East ram zingah Israel dawtah Saudi hi F-35 fighter nei thei hmasa ber a ni ang.

President Trump hi Thawhlehni khan Middle East ram pathum - Saudi Arabia, Syria leh United Arab Emirates (UAE) tlawh turin a zin chhuak a, Saudi tlawh hmasa berin nimin khan Syria a pan. Thawhlehni khan US chuan Syria ram a hrekna a hlih tur thu a puang tawh bawk. Kum 1979 khan Syria hi firfiakte thlawptua puhin US chuan puangin a hrek a, kum 2004-ah hrekna siam belhin, kum 2011-a Syria civil war a thlen hnuah hrekna dang a siam belh leh bawk.