Paris beitu ukil-te an bang

France khawpui, Paris beihnaa mawhphurtu bera rin, Salah Abdeslam-a chu a ukilten a tana din an tum tawh loh thu an sawi.

TV-a interview an neihnaah, a ukil Franker Berton chuan ukil atana a hman dang, Sven Mary nen chuan Abdeslam tana din an tum tawh loh thu an sawi a, "Thil engmah sawichhuah a tum lo a, tih theih engmah kan nei lo a ni. A tirah pawh a ṭawng chhuah duh loh chuan a tana din zui zel kan tum lo tih kan lo sawi tawh a ni", ti.

Kumin April thla khan Abdeslam hi Belgium aṭangin France ramah thawn a ni a, mahse zawhna hrang hrang zawhte chu engmah a chhang duh lo a, a tanna cell-a camera dah a ni chu a lungawi lo hle a, ukil neih pawh a duh tawh lo nia sawi a ni.

Nikum November thla khan firfiakten Paris khawpuia bar, restaurant, concert hall leh national stadium-te beiin, mi 130 an thi a ni. He pawikhawihna thlengah hian Abdeslam hi bultumtuah puh a ni a, kumin March 18 khan Belgium ramah man a ni.