Santos-a'n Nobel Prize pawisa midangte tan hlan

Khawvel chawimawina sang, Nobel Peace Prize dawng tura thlan, Colombia President Juan Manuel Santos chuan Nobel Prize-in pawisa a ken tel, dollar 925,000 chu an ram tualchhung buaina thleng tuartute tan a hlan dawn tih a sawi.

President Santos hian kum 52 zet hel tawh, FARC helpawl chu thla hmasa khan inremna a ziahpui a ni. Mahse Colombia mipuite ngaihdan lakah, sorkar leh helpawlten inremna siam hi an thlawp loh avangin tha tharin FARC hi inbiakna neihpui leh a tum thu a lo sawi tawh a ni.

Kum 50 chuang zet Colombia rama FARC hel leh sorkar inbeihna avang hian mi nuai 2.6 vel an thi a, mi maktaduai ruk chuang chu himna zawngin an tlanchhe bawk.

President Santos chuan a chhungte nena ngun taka an ngaihtuah hnuin Nobel Prize-in pawisa a ken tel chu tualchhung buaina thleng tuartute tana hlan an rel tih a sawi a, chawimawina a dawn tur pawh chu hun harsa tak leh khirh tak an tawng reng chunga Colombia mipuite remna leh muanna a awm theihna tura beiseina an hloh lohzia tilangtu a ni, a ti. Remna a awm theihna atana thawktu party hrang hrangte tan a hlan tih a sawi bawk.