NY Central Park-ah field hospital siam dawn
New York khawpuiah hri kai an pun belh zel avangin damdawi-in hrang hrang pawh an tawt ṭan tawh a, hei vang hian vawiin hian Central Park-ah khum 68 awmna tur field hospital siam a ni dawn.
Mayor Bill de Blasio chuan Mount Sinai Hospital chuan relief organisation, Samaritan's Purse nena thawk dunin field hospital hi an siam dawn tih a sawi. City Parks department leh Mayor office-te pawhin an thawhpui nghal dawn a, vawiin vek hian hman theih nghal tura peih fel an tum.
Blasio chuan khawpui chhunga damdawi-in hrang hrangah chuan kar khat daih tur medical supply an la nei tih a sawi a, mahse kar khat liam hnuah chuan hmanruate an mamawh belh dawn a, a bikin ventilator tam tak an mamawh dawn tih a sawi.
Governor Andrew Cuomo chuan an state-a hri darh zel tur venna turin theihtawp an chhuah mek tih a sawi a, hemi rual hian a chhe ber tawng tura inbuatsaih tel a ṭul tih a sawi.