US President-in social distancing rules puan hun pawtsei
United States (US) president Donald Trump chuan an rama coronavirus hluarna ber, New York state-a hri leng vang mi 1,000 chuang an thih hnuah, health official-te thurawn angin hri leng laka invenna social distancing rules a puan chu April 30 thleng atan a pawtsei.
Pathianni-a White House-a chanchinthar lakhawmtute a kawmnaah, president Trump chuan kar hnih chhung chu hri vanga thi an tam chhoh hun tur nia a lan thu a sawi. Hei vang hian hri darh tur venna atana mipuite inhlata awm tura hriattirna an lo tih tawh chu khauh taka zawm a ngai a ni, a ti. Social distancing rules hi ni 15 chhung atan a lo puang tawh a, nimin kha a tawp hun tur a ni. Mahse April 30 thleng atan a pawtsei leh a, hei hi hri darh zel tur danna atana thil pawimawh a ni, a ti.