Singapore-ah PAP sorkar leh dawn

Singapore inthlanpui, May 3-a neih vote tlate chhiar a ni ta a, rorellai People's Action Party (PAP) chuan seat 97 awmah seat 87 lain prime minister Lawrence Wong leh a kaihhruai sorkar chuan rin a la hlawh hle.

PAP hian vote tla 2,386,452 aṭangin 65.57% an hmu pha a, kum 2020 inthlanpuiah khan 61.24% an hmu a, hei hi kum 52 mi, PM Wong in party a kaihhruai hnua fiahna a paltlangna hmasa ber a ni. PAP hi Singapore-a political party upa ber leh lian ber niin, kum 1965-a an ram independence aṭangin an la sorkar chho a ni.

Nimin tlai dar 3 khan press conference neiin, Wong chuan an party-in dik leh chak taka ro an relna chu chhunzawm turin Singapore mipuite chuan hun an pe leh a ni tih a sawi. Inthlan hi an ramin hun harsa tak a tawh laiin an nei a, mahse result chuan hun harsa leh khirh tak pawh ṭha zawka hmachhawn thei turin a dah a ni, a ti.

He result hi mipuiten an ring tawk zia lantirtu a ni tiin, mipuite pawhin inringtawk taka hma lam hun an thlir theih tur thu a sawi. PAP chu a hma aia nasa zawkin Singapore hmasawnna atana a thawh tur thu a sawi.

Eptu pawl chak ber zinga mi nia sawi, Workers' Party chuan an seat neih ngai, seat 10 an la hum thei a ni.

Elections Department (ELD) chuan Parliament-a seat 97 awm aṭangin mipuite seat 92 ah vote an thlak tih sawiin, vote thlakna polling station 1,240 siam a ni. Hei hi kum 1948 hnua Singapore inthlanpui vawi 19-na leh, an independnce hnua an inthlan vawi 14-na a ni bawk.