Jerusalem khaw daia ram kang vangin national emergency puang

Palestinian firfiak pawl, Hamas nena indo mek Israel chuan an ram chhungah harsatna dang an tawh belh. Jerusalem khaw daiah ram kang nasa tak chhuakin, hei vang hian national emergency puan a ni. Mi tam tak hmun him lamah sawn chhuah an ni tawh.

Thuneitute chuan Jerusalem khaw daia ram kang hi an ram chanchina ram kang a thlen nasat ber nia sawiin, Nilaini aṭanga kangmei chhuak kha a ni tih an sawi. Khua a ro leh thli na tak a tleh tel avangin kangmei ṭhelh hna hi thawh chak a har hle.

Israel prime minister Benjamin Netanyahu chuan kamgmei hi a kankai chak avangin Jerusalem khaw chhung pawh a man kai mai a hlauhthawnawm tih a sawi a, Jerusalem chauh ni loin ram pumah emergency a puang a ni. Tuna a ngaih pawimawh hmasak ber tur chu Jerusalem khua lo venhim chu a ni tih a sawi. Ram kang ṭhelh tur hian kangṭhelhtute bakah sipaite tirh an ni.

Emergency medical service, Magen David Adom (MDA) chuan hliam tuar mi 23 enkawl an ni tawh tih sawiin, mi 13 chu an taksa a kan nasat leh meikhu an hip luh tam avangin damdawi-inah dah an ni tih a sawi. Ram kang vang hian Tel Aviv leh Jerusalem inkalpawhna kawngpui lian ber, Route 1 chu khar a ni tawh bawk. Kangmei chhuahna biala national park leh forest-te pawh khar vek niin, rel service pawh tih tawp a ni bawk.

Israel sorkar chuan ram kang ṭhelh pui turin ram dangte a ngen a; Italy, Croatia leh North Macedonia ram chuan puitu tur an tir tawh. Kang ṭhelhna atan hian helicopter hman a ni bawk a, mahse khaw awmdanin a zir loh avangin an duh angin an thawk thei lo tih Fire chief Eyal Caspi chuan a sawi.