Nepal-in Mt Everest lawn thei chin bithliah siam

Nepal sorkar chuan khawvela tlang sang ber, Mount Everest lawn tum an tam ṭhin avang leh, tlang lawn zingah a sang thlen hnua thi awm fo ṭhin tih ziaawm a nih theihna turin tlang lawn thei chin bithliah a siam. A hmaa tlang, meter 7,000 china sang pakhat tal lo lawn chhuak tawhte chauh Mt Everest-ah lawn phalsak an ni tawh bawk.

Kum 1953, May 29-a New Zealand mi Edmund Hillary leh Nepal Sherpa Tenzing Norgay-ten meter 8,849-a sang, Mt Everest tlang chhip an lawn thlen hnu khan khawvel hmun hrang hrang aṭangin he tlang lawn chhuak hi mi sang tel an awm tawh a ni. Official data-a a lan danin, Hillary-Norgay summit hnuah tlawn mi 9,000 velin Mt Everest hi an lawn chhuak tawh a, hetih lai hian mi 300 chuangin an thih phah tawh thung. Tlanga thite ruang lak chhuah hi a harsain a hautak hle a, senso hi USD 20,000 - 200,000 inkar a ngai ṭhin.

Nepal Parliament upper house chuan meter 7,000 leh a aia sang tlan lawn chhuak hmasa phawt lote tana Mt Everest lawn khapna tur hi pass in, khawvela tlang sang ber lawn tur hian theihna an nei tih an lantir hmasak phawt a ngai a ni, a ti. Kumin atana Mt Everest lawn, phalna pek chhuah tawh hi mi 400 an tling tawh a, 500 vel an tlin chhoh a la rinawm.