NKorea-in destroyer thar aṭangin missile kap chhuak

North Korea chuan nimin khan destroyer an neih thar hmangin a vawi khatna atan missile an kap chhuak.

Kar liam ta khan NKorea hian destroyer thar, ton 5,000 a rit hi a pholang a, an warship industry hnuaia ralthuam a siam chhuah ṭha ber nia sawi a ni. Korean Central News Agency chuan destroyer enchhinna hi an ram hotu lu ber, Kim Jong-un pawhin a telpui tih a tarlang.

Indo lawng lian an tlangzarhnaah hian Kim chuan nakkum kumtir lamah Navy te kuta hlan a nih tur thu a puang. Tuipui lam aṭanga an ram venhim hna thawhna kawngah Navy te chu thuam chak chhoh zel a tum thu sawiin, nuclear-powered submarine neih chu an hmabak a nih thu a sawi.

North Korea hian Russia-Ukraine indo meknaah Russia pui tura sipaite a tirh thu a sawichiang tawh a, hemi hnu hian Russia president Vladimir Putin pawhin North Korea hnenah lawmthu hrilhin, Russia tana NKorea sipaite inpekna chu an theihnghilh ngai dawn lo tih a sawi.

US, South Korea leh ram dang ṭhenkhat chuan NKorea hian sipaite a tirh bakah, Russia hi ralthuam tam tham tak a supply bawk niin an tarlang. Hei vang hian Russia hian lawmthu hrilhna atan NKorea nuclear program thuam chak theihna tur high-tech tehnology te a pek an hlauthawng hle.