Canada inthlanah Liberals chak

Canada ram inthlanpui, Thawhṭannia neihah prime minister Mark Carney kaihhruai Liberal Party chu party mala seat la hnem ber a ni. Result kimchang hriat a la nih loh avangin majority an la pha dawn em tih erawh a la chiang lo.

Liberals hi electoral district 165-ah chakin, Conservatives chuan seat 147 an la bawk. Yves Francois Blanchet kaihhruai Bloc Quebecois chuan seat 23 a lak phak rin a ni a, Jamgeet Singh kaihhruai NDP in seat 7 a la ve bawk. Member 343 awmna Parliament-ah hian majority nei tur hian seat 172 neih tlin a ngai a ni.

Conservative Party hruaitu Pierre Poilievre chuan an chak loh an pawm thu sawiin, US president Donald Trump-an chhiah lak leh an ram luahsak tum chungchanga a vauna do let turin Liberal sorkar chu an thawhpui zel dawn tih a sawi.

Inthlana Liberals an chak hi Canada politics chanchina thil inthlak danglamna thlen lian tak a ni. Kumin January 6-a Justin Trudeau-a'n PM a nihna aṭanga a ban tur thu a puan lai kha Conservatie hian mipui ngaihdan lak hrang hrangah Liberals lakah point 20 chuangin hma an hruai a ni. Mahse Carney-a'n Trudeau a thlak hnua US President-in an ram a vauna te na taka dodal a, US laka Canada innghat lutuk tih ziaawm a ngaih thutea sawi hnuah Liberals hian hman an sawn chak chho hle a ni.