Putin-a'n Ukraine-ah ni 3 chhung inkahhai a puang

Russia president Vladimir Putin chuan May 8-10, ni thum chhung atan Ukraine-ah inkahhai a puang a, Ukraine lam pawhin an zawm a beisei thu a sawi bawk.

Russia hian Indopui II-naa an ramin hnehna a chan champha, May 9-a Victory Day a hman tur denchhenin inkahhai hi a puang a, mahse Ukraine-in a zawm ve loh a, hemi chhunga a bei a nih chuan na takin an chhang let nghal dawn tih a tarlang bawk.

Tun ṭum hi kumin chhunga Russia-in inkahhai a puan ṭum hnihna a ni. Easter Sunday pualin darkar 30 chhung inkahhai a lo puang tawh a, mahse ram pahnihte hian he inremna hi zawm ṭha loha an inpuh tawn thung.

Ukraine chuan Russia-in boruak ṭha siam a duh tak tak a nih chuan ni 30 chhung inkahhai hi a puang tur a ni, a ti. US pawhin inkahhai tluantling puang tura a duh thu a sawi ve bawk. Ukraine foreign minister Andrii Sybiha chuan Ukraine chu ni 30 chhung inkahhai puang turin a inpeih reng a, May 8 nghah kher a ṭulna a hriat loh thu a sawi.

US president Donald Trump chuan tun hnaia Russia-in Ukraine khawpui, Kyiv a beih chungchangah Russia laka a lawm loh thu a social media-ah a post a, Putin chu Ukraine an beihna ti tawp turin a ti a ni. US hian Russia-Ukraine indona tih tawp a nih theihna tura inremna siam turin ram pahnihte hi a nawr reng a ni.

Russia foreign minister Sergey Lavrov chuan a ram chuan inbiakna nei turin an inhawng reng a,mahse mi dang kaltlang loa inbiakna nei tur chuan Ukraine in hma a lak hmasak a ngai a ni, a ti.