Australia inthlanpui atan vote thlak ṭan

Australia ram inthlanpui chu neih ṭan a ni a, vote thlak hmasate chuan nimin aṭang khan vote an thlak thei ṭan. Inthlan ni tak hi May 3 hi a ni.

May 3-a chhan hrang hrang vanga vote thlak thei lote tan nimin aṭang khan polling station-te hawn ṭan a ni. Inthlan ni tak thlen hmain voter zahve velin vote hi an thlak hman beisei a ni.

Prime minister leh Labor Party hruaitu, Anthony Albanese leh eptu pawl, conservative Liberal party hruaitu Peter Dutton te pawh an campaign ngawrh hle. Nimin khan Syndey-ah vawi thumna ata TV debate an nei a, Pathianni hian debate vawi lina an nei leh ang. Hruaitu pahnihte hian Thawhṭanni khan Roman Catholic kohhran hotu, Pope Francis thih vangin campaign an ṭhulh ve ve a ni. Pope sunna atan sorkar building hrang hrangah an hnam puanzar chu a ngul chanve ah zar a ni bawk.

PM Albanese hi Catholic chhungkuaa seilian a ni a, nimin zinga Melbourne-a St.Patrick's Cathedral-a Pope puala mass buatsaiha pawh a tel a ni. Dutton hi a pa Catholic leh a nu Protestant a ni thung. 2021 census-ah khan Australia mipui zinga 20% chu Catholic an ni.