Israel-in Gaza medic 15 thihna an tih sual a nih thu sawi

Israel chuan March 23-a an sipaiten Gaza chhim lam, Tel al-Sultan district-a beihpui an thlaknaah Palestinia medic 15 thihna chu an tih sual a ni tih Pathianni khan a sawi a, deputy commander pawh ban nghal a ni.

Medical worker-te beih an ni hi Israel chuan dem leh sawisel a hlawh nasa hle. He thil thleng hi chhui chianin, a tirah chuan an motor-ah hian emergency signal an chhi lo niin an sawi a, mahse a hnuah cellphone video hmuh chhuah pakhatah hei hi a dik lo tih hriat a ni. Video footage-ah hian ambulance hian emergency signal a chhit bakah an logo pawh a lang chiang hle a ni.

He thil thleng an chhuinaah, deputy battalion commander hian thil hre dik tawk loin, ambulance zawng zawng chu Hamas ho ta vek nia ngaiin an kap niin an sawi. He inbeihna thlengah hian Red Crescent mi leh sa pariat, civil defence worker paruk leh UN staff pakhat an thi a ni.An ruang hi thlan lian takah a ruala phum an ni a, kar khat hnuah an phumna hmun hi UN leh chhanchhuah hna thawktuten an thleng thei chauh a ni. Israel sipaite chuan an ruang hi ui leh ramsate an tlan mai tur venna atan an phum niin an sawi.