Hamas-in tang inthleng tura Israel rawtna hnawl

Hamas hruaitu Khalil al-Hayya chuan Israel-in inremna lailawk leh tang inthlengna tura rawtna a siam chu an hnawl tih a sawi. Gaza Strip-a induna tih tawpna tur leh, he hmun aṭanga Israel sipaite hnuhdawhna tur huam tel lo rawtna chu an pawm dawn lo tih a sawi.

Khalil al-Hayya hian April 17, 2025 khan television kaltlanga thu a sawiah Hamas duhdan hi a sawi chhuak a ni.

Hamas leh Israel inkara palai hna thawktute chuan kar liam ta Ningani khan Israe-in Gaza Strip-a ni 45 chhung atana inkahhai puan lailawk a, hemi chhunga Hamas mi hren nungdama la awm mek 10 te chhuah tura rawtna a siam chu Hamas te hi hriattir a ni. Hemi chhan letna atan hian Israel chuan an ram jail hrang hranga tang mek, Palestinian 1,231 chhuah a, Gaza-ah chhawmdawltute luh tir a remti bawk. Indona a tawp theihna atan Hamas chu an ralthuamte dah thla turin a phut bawk a, mahse hei hi Hamas lam chuan an lo hnawl nghal a ni.

Hamas hruaitu hi Gaza pawn lamah a khawsa mek a, Israel prime minister Benjamin Netanyahu policy, inremna tluantling lo siam tumnaah tel an tum lo tih a sawi. January thlaa inkahhai puanna tura inremna an ziah chu Israel lamin a chhunzawm duh lo nia sawiin, Netanyahu chuan an lama pawm theih loh rawtna a siam a ni, a ti.

Al-Hayya hi Gaza Strip-a inremna kawng zawnga inbiaknaa Hamas palai hotu a ni. Hamas chuan Gaza indona a tawp hlen theihna tur inremna siam an inpeih a, hemi atan hian an mi hren mekte pawh chhuah vek an inhuam thu a sawi.

Hamas hruaitu thusawi hi Israwl finance minister Bezalel Smotrich chuan chhang let nghalin, Israel chuan Gaza-a hnehna an chan a, mi tang mekte an hruai kir vek hma chuan Hamas duh dan ang zawm emaw, indona tih tawp vek emaw a tum dawn lo tih a sawi. National security minister Itamar Ben Gvir pawhin Hamas ten ṭhingṭhia an ngen hma chu Israel sipaite na zawka nawr tir turin a ti ve bawk. "Hamas hian an duhdan angin an lo rel tur a ni lo. Inremna, inkahhai leh chhamdawlnate a awm rih lo ang a, Gaza-a Nazi te an inpek vek hma chu indona hi chhunzawm zel a ni ang, tiin a lo sawi ve bawk.

Hamas hian October 7, 2023-a Israel an beih ṭuma an mi man, mi 251 zinga mi 59 an la hreng mek. An mi hren zingah hian nungdama awm chu 24 nia hriat an ni.