Israel-in Gaza-a medical mi leh sa beihna thleng An tihsual palh a nih thu an sawi

Israel sipaite chuan March thlaa Gaza Strip-a medical mi leh sa beihnaa Palestinian medic 15 thihna thleng chu an tihsual palh a nih thu an sawi.

Gaza Strip-a an tlan laiin medical mi leh sate chuanan motor hi a headlight/emergency signal ti eng loin a tlan niin Israel sipaite hian a hmain an lo sawi tawh a, sipaite bul hnaia a tlan chu ringhlelin an kap niin an sawi. Mahse video footage tih chhuahah emergency signal an chhi tih a lan hnuin Israel hian thuchhuah a siam a ni.

Footage-ah hian Red Crescent leh Civil Defence team chu muangchanga tlanin, emergency light an ti en bakah an logo pawh a lang thei a ni. An chet danah pawh rinhlelhawm thil a awm lo nia a lan thu an team lam chuan an sawi bawk. Ambulance pakhat panna an kal laiin sipaite hian an lo kap a, he inbeihnaah hian Red Crescent mi leh sa pariat, Civil Defence worker paruk leh UN staff pakhat an thi. He thil thlen hun hi March 23 kha niin,, Iserael sipaite hian Gaza chhim lam, Rafah khuaa Tel al-Sultan distric-a beihpui an thlak lai a ni. Hemi ṭuma thite ruang hi Israel sipaite hian hmun khatah an phum a, an ruang hi UN leh rescue worker-te chuan kar khat hnuah an la chhuak a ni.

Palestinian Red Crescent Society hotu, Younes Al-Khatib chuan Israel sipaite chet dan hi mi dangin an chhui chian ngei a phut thu leh, sipai vekin an chhui chianna chu an ring zo lo tih a sawi. Israel sipaite hian an bitumte hi hnaihchilh takin an kap a ni, a ti.

Israel hian Hamas firfiakte hi ambulance leh emergency motor-ahte biruin, hospital leh civil mite chenna hmunahte tawmin, Israel beihna atan an lo hmang fo tawh niin a lo sawi tawh ṭhin thung.