Gaza chungchangah Trump leh Netanyahu inhmu leh dawn

US president Donald Trump leh Israel prime minister Benjamin Netanyahu te chu vawiin hian White House-ah Gaza Strip chungchangah an inhmu leh dawn nia sawi a ni. Hei hi kumin January thlaa President Trump-a'n office a luah hnua ṭum hnih an inkawmna tur a ni.

Gaza Strip-a Israel leh Hamas-ten inkahhai an puan thawh khatna a zawh hnuah Israel sipaite chuan Hamas hmunte an bei chhunzawm leh tawh a, hei bakah Hamas chu an mi hren mekte chhuah tura nawrna atan security corridor tharah Israel sipaite dah an ni leh bawk. Israel defence minister chuan Gaza biala ram lak belh zel an tum thu leh, hengte security zone-ah dah belh zel an tum thu a sawi.

Israel Prime Minister office chuan Trump leh Netanyahu te hian tun hnaia US-in ram dang bungraw lak luh tura chhiah siam thar chungchangte, Hamas mi hrente chhanchhuah an nih theih dan turte, Israel-Turkey inkar boruak bakah,, Iran-in Israel a vauna leh International Criminal Court chungchangte an sawi dun dawn tih a tarlang. ICC hian Gaza-a indo na thleng kaihhawnihah Netanyahu manna tur thupek hi a ti chhuak a ni. Mahse US hi court member a ni ve lo thung.

Hamas hian October 7, 2023-a Israel an beih ṭum an mi man zinga mi 59 an la hreng mek a, an zinga hian nungdama awm chu 24 chauh an ni tawh nia rin a ni bawk. Hamas hian Israel-in a ram jail hrang hranga tang mek Palestinian te a chhuah a, Gaza Strip-a inkahhai tluantling puan a, Israel sipaite an inlak chhuah chauhin an mi hrente hi an chhuah dawn niin an sawi.