May 3-ah Australia inthlanpui nei dawn

Australia prime minister Anthony Albanese chuan an ram inthlanpui chu May 3-ah neih a ni dawn tih nimin khan Parliament-ah a puang.

Inthlanpui neih turah hian party lian pahnih, rorellai Labor Party leh eptu party, Liberal Party te chu inbei tawk hle tura ngaih a ni. Hei vang hian independent MP leh party tenau zawkte chu an pawimawh hle dawn a ni. Australia rama khawsak hautak chho lutukte chu inthlan campaign au hla pawimawh tak tura ngaih a ni.

Nimin khan PM Albanese chuan press conference neiin, an ramin harsatna a neihte chin ngei a tiam. Free healthcare, zirlai loan ba tih tawp leh chhiah lak tih tlem a tum dante pawh a lo opuang tawh a ni. An khingpui, Liberal Party kaihhruai ṭangrual pawl thlan tlin an nih chuan an ramin hma sawn lam aiin hnungtawlh lam a pan dawn niin a sawi bawk.

Labor party hian inthlan lo awm turah hnehna an chang lo a nih chuan an ram chanchina kum 100 dawn chhunga term khat chauh hman thei sorkar hmasa ber a ni ang.

Hetih hian Liberal-National ṭangrual pawl hotu, Peter Dutton chuan an ram chu Labor party kaihhruai sorkar hnuaia awm zel thei an ni tawh lo tih sawiin, ram mipuite chuan Labor sorkar hnuaiah an ram dinhmun a ṭha zawk em tih pawh an inzawh a ngai a ni, a ti.

Labor party sorkar thutlukna ṭha lo tak tak siam avangin Australia mipuite dinhmun a harsa zual a, puih ngaiin an awm a ni,tiin a sawi. An party chuan an ram chu kawng dik lamah a hruai kir leh tur thhu sawiin, ṭul loa sorkarin sum tam tak a senral te ti tawpin public service tih tlem a, ram dang aṭanga pem lut phal zat ti tlem leh, fuel leh energy man tih tlawmte a tiam.