April 28-ah Canada inthlanpui nei dawn

Canada prime minister thar Mark Carney chuan Pathianni khan Governor General Mary Simon hmuin, an ram inthlanpui buatsaih a nih theihna atana parliament, House of Commons ṭhiat turin a ngen. Meeting an neih zawhah an ram inthlanpui chu April 28,2025-ah neih a ni dawn tih a puang.

Dan pangngaiah chuan Canada ram inthlanpui hi October 27-ah neih tur a ni a, mahe thla rukin inthlan hi an nei hma dawn ta a ni.

Justin Trudeau thlak a, Canada PM atana lak luh a nih hnuah Carney chuan an ram inrelbawl dan kalphung thlak a, danglamna nasa tak thlen a tiam a ni. Heng zingah hian middle class chhiah pek tih tlem pawh a tel. US president Donald Trump hmalakna hnuaia US leh Canada-in 'trade war' an neih chhohah pawh theihtawpa beih let a tum thu a sawi.

Mark Carney hi banker hlui niin, Liberal party hruaitu atana thlan niin Canada PM 24-na atan lak luh ni mah se, House of Commons member pawh a ni lo a ni.

Inthlan hun tur puan a nih veleh eptu pawl Conservative Party chuan Pathianniah an party hruaitu, Pierre Poilievre kaihhruaiin Gatineau, Quebec-ah campaign an ṭan nghal. PM Carney pawhin Atlantic bial aṭangin campaign a ṭan ve nghal bawk.