China-in Canada mi 4 a ti hlum

China chuan ruihhlo kaihhnawih thubuaia thiam loh chantir, Canada mi pali chu kumin kum tir lam khan a ti hlum niin Canada thuneitute chuan an sawi.

Canada foreign minister Melanie Joly chuan mi pali tih hlumte hi dual citizen an ni a, an chhungte ngenna avangin an nihna erawh puanzar a ni lo tih a sawi.Minister chuan China sorkar thiltih dan chu na taka demin, heng mi palite tan hian a mal ṭheuhin zahngaihna lantir tura a ngensak thu a sawi a ni.

Hetih lai hian Canada-a China embassy thupuangtu chuan mi palite pawikhawihna hi lian tham tak a ni tiin, Canada sorkar chuan thuchhuah duh danah fimkhur turin a ti a, China in a ram chhunga rorelna dik tak kengkawh tura thuneihna a neih chu zahsak turin a ti bawk.

China hian ruihhlo, ei ruk leh ram phatsan kaihhnawih thubuaiah thi tura hremna hi a la hmang fo a ni. Thuneitute chuan an tih hlum zat hi an puangzar ngai lo a, mahse human rights group chuan China hi khawvela thiam loh chang tih hlum tamna ber ram zingah an chhiar tel reng a ni. Mahse ram dang mi tih hlum erawh a thleng khat hle thung.

Kum 2018-a US ngenna anga Canada-in an rama Chinese telecom executive, Meng Wanzhou a man hnu khan ram pahnih inkar boruak hi a ṭha lo chho a ni. China chuan a chhan letna atan Canada mi pahnih a man a, mahse chhuah an ni tawh a ni. Kumin kumtir lam khan Canada media chuan an ram inthlanpui vawi hnihah China inrawlh dan, intelligence report nia sawi chu an lo ti chhuak tawh bawk a, China chuan he report hi thu dik lo, belhchian dawl lo niin a sawi thung. Tun hnaiah Canada-in China aṭanga electric vehicle steel leh aluminium lak luhah chhiah a ti sang a, China hian Canada aṭanga thlai leh ei tur lam thawn luhah chhiah a ti sang ve bawk a ni.