US in Venezuela immigrants-te El Salvador-ah thawn kir
White House-in gang member nia a puh Venezuela mi leh sa 200 chuang chu, US aṭangin El Salvador-a supermax lunginah thawn an ni tawh. US federal judge-in mi tang thawn kirna tur thupek hi tikhawtlai mah se, Pathian ni khan US aṭang hian sawnchhuah an ni ta tho a ni.
El Salvador president, Nayib Bukele chuan social media-ah Venezuelan gang, Tren de Aragua member 238 te chu Pathianni zing khan, international MS-13 gang member 23-te nen Central America ram an thleng tawh tih a ziak. US sorkar leh El Salvador chuan an mi mante nihna an la puang chhuak lo ve ve a, misual nia sawina emaw, gang member an nihna chungchang pawh chipchiar taka tarlan a ni lo.
US President Donald Trump chuan Tren de Aragua chu United States ram bei leh vau-ah puhin, Alien Enemies Act, 1798 hmanna tur thuchhuah a siam thu Inrinni khan a puang. Gang member-te hi US laka indona an puan avangin ram dangah hnawhchhuah an nih tur thu a sawi bawk. Alien Enemies Act hi Indopui II-na lai khan Japanese-American civil mite khuahkhirh nan an hman hnuhnun ber a ni.
Inrinni tlai khan Washington DC US District judge, James Boasberg chuan Trump-a thupuan-in a huam, ram danga thawnchhuah turte chu, dan anga hmalakna dang ngaihtuah a nih chhung, ni 14 chhung tikhawtlai turin thupek a chhuah a ni. Ukil-te'n an mi thawn kir tur phurtu thlawhnate chu an thlawh chhuah tawh thu an hrilh hnuah, Judge Boasberg chuan thlawhnate chu ko kir turin thupek a pe niin US media-te chuan an tarlang.
Pathianni khan Department of Justice ukil-te chuan he thupek hi hman a nih loh chhan Court-ah sawifiahin, ram danga thawn chhuahte hi United States ram aṭanga lakchhuah an nih tawh vang a ni, tiin an sawi. Senior administration official chuan Inrinni khan mi 261 sawnchhuah an nih thu sawiin, an zinga 137 chu gang nena inzawmna nei nia sawi a awm avangin Alien Enemies Act hmanga hnawhchhuah an nih thu a sawi.
Venezuela chuan Trump-a'n Alien Enemies Act a hmang chu sawiselin, Venezuela mi US-a pem lutte chu dik lo takin dan bawhchhiaah a puh a, mihring chanchina thil thleng ṭha lo ber, saltanna aṭanga Nazi concentration camp-a thil rapthlak thlengte ang mai a ni, a ti.