Israel-in Gaza a beihnaah mi 9 thi

March 15 khan Israel chuan Gaza hmar lam Beit Lahia beiin, chhawmdawlna hnathawktu mi 9 in nunna an chan bakah, mi engemawzatin hliam an tuar tih Gaza sorkar media office chuan a puang. He thil thleng hi January-a inkahhaipuan a nihhnua pawikhawihna thleng lianber a ni.

Thi zinga mi pathum chu media team niin, Gaza-a chawmdawl hnathawh dante document tura kal an nih thu Palestinian Journalist’s Protection Centre chuan a tarlang.

Hamas chuan Israel sipaite chet dan chu na taka demin, Beit Lahia-a chawmdawlna hnathawktute chunga thil thleng chu insuatna rapthlak a ni, tiin thuchuah an siam.

Ralthuam kenglo civil mi, chawmdawlna hna thawka midang puitute thah an ni hi international leh humanitarian law palzutna nasa tak a ni,” tiin Hamas Govt Media Office Director General chuan a sawi bawk.

Israel Defence Force chuan Inrinnia an mi beihte hi Beit Lahia-a firfiak pahnih, drone hmanga IDF sipaite beih tum an nih thu an sawi ve thung.

“A hnuah firfiakte hi lo kal belhin, drone hmanga thunun ralthuamte kengin motor-ah an lut a, IDF chuan firfiakte hi an kap ta a ni,” tiin Israel sipaite chuan an sawi.

Israel sipaite chuan inkahhaipuan chu Hamas lamin an bawhchhiat avangin Gaza-ah military operation an la kalpui reng tih an sawi bawk.

US chu Israel leh Hamas inkarah palai hna thawkin, Inrinnia inbeihna thlen hma lawk hian Hamas-ina an mi man la damte chhuah zalenna tur leh thla khat chhung inkahhai puan belhna tur a lo duang tawh nghe nghe.

He inremna thar US-in a duanah hian, Gaza-a chawmdawlna lut tur Israel-in kar hnih lai a dan tawh chu a titawp ang a, Hamas lam pawhin inkahhai puan chu pawtseiin American-Israel sipai Edan Alexander leh mi dang pali ruang Gaza-a hren mek chu a pe let dawn bawk a ni.

Gaza-a Inkahhai puan chhunzawm chungchangah inbiakna a la kal mek zel a, amaherawhchu Israel leh Hamas-te chu US Middle East palaiin inremna tur a duanah an thu a inhmu thei niin palestinian official chuan a sawi.

Inkahhai puan thawh khatna hi March 1 khan a tawp tawh a ni.