Jail-a lut leh turin SKorea president hlui hriattir
South Korea Supreme Court chuan an ram president hlui, Lee Myung-bak chu jail-a lut leh turin nimin khan a hriattir.
Lee hi kum 2018 kumtawp lam khan eiruk leh thamna laa puhna thubuaiah thiam loh chantirin jail-ah dah a ni a, a hnuah appeals court chuan kum 17 tang turin hremna a pe a, mahse hemi rual hian court sang zawka a appeal-na nghah chhungin bail-a chhuah a phalsak a ni.
Nimin khan Supreme Court chuan kum 17 tang tura hremna pek tawh hi pawmin, Lee chu jail-a lut leh turin a hriattir nghal a ni. Kum 78 mi, Lee hi kum 2008-2013 a South Korea President a nih chhungin won tluklehdingawn 25.2 tihchingpen leh, thamna won tluklehdingawn 9.4 laah puh a ni. Court-in nimina thupek a tihchhuah hnu hian police-te chu Seoul-a Lee-inah tirh nghal an ni.
South Korea president hlui zinga la dam palite chu jail tang lai leh thubuai nei lai vek an ni. Lee thlaktu, kum 2013-2017 chhunga President dinhmun chelhtu, Park Geun-hye pawh eiruk chungchangah leh a thuneihna dik lo taka hmanga puhnaah kum 20 tang tura hrem niin jail a tang mek. President hlui dang Roh Moo-hyun chu eirua puhna thubuai ngaihtuah a nih laiin a lo intihlum tawh bawk a ni.