Kathmandu-ah Nepal lal hlui King Gyanendra Shah an hmuak

Nepal lal hlui, King Gyanendra Shah chu Pathianni khan an ram khawpui, Kathmandu-ah kalin lal neih duhtu mi tam takin airport-ah an lo hmuak.

Gyanendra Shah hian an rama sakhaw hmun pawimawh hrang hrangte a tlawhkual hnuah, Pokhara aṭangin Kathmandu hi a pan a ni. Airport panna kawngah lal rorelna hnuaia awm thlawptu, Rastriya Prajatantra Party mi leh sate chuan a thlalak leh an ram flag-te kengin an lo hmuak a ni. Gyanendra hi amah thlawptute nen lal inah luh an tum dawn nia sawi a nih vangin, lo dang turin venhimna lam pawh tih khauh a ni. Mahse lal in pan loin, Kathmandu khaw daia a private resident, Nirmal Niwas a pan zawk a, boruak duhawm lo thleng a awm lo.

Kum 2008 khan People's Movement thleng vanga Nepal rama kum 240 chhung lal rorelna hnuaia an awm chu tih tawp a ni. Gyanendra pawh Kathmandu-a lal in, Narayanhiti Palace aṭangin Nagajuna palace-ah a insawn nghal bawk. Narayanhiti Palace hi museum-ah siam zui a ni. Lallukhum, a tiang leh lal tlereuh leh thil neih dangte chu sorkar kutah a lut zui bawk.

Lal ban a nih hnu hian Nepal-ah sorkar ngelnghet a la ding thei lo a, kum 2008 aṭangin sorkar 13 zet an ding hman a, hei vang hian lal rorelna hnuaia awm duh lo ṭhin tam tak pawhin lal neih leh hi an duh a ni.

Gyanendra hi Nepal lal a nihna aṭanga a ban hnuah an ram politics chungchangah aw a chhuah ngai lo a, mahse tun hnaiah erawh mipui hmuhah a inlan fo a ni. February thlaa Nepal Democracy Day an hman dawn pawh khan thuchhuah siamin, an ram humhim leh inlungrual a, hma an sawnna turin chet chhuah a hun tih a sawi. Hemi hnu hian lal neih leh duhtu lam thawm a lian sawt hle.