Ralthuam chaw lut tam ber Ukraine; Ralthuam hralh chhuak tam ber US

Ukraine chu khawvela ralthuam chawk lut tam ber niin India a rawn khum a, kum 2020-24 chhunga a ralthuam chawk luh hi kum 2015-2019 aiin a let 100 dawnin a tam.

Stockholm International Peace Research Institute (SIPRI) in data a tih chhuahah, Ukraine hian 2020-24 chhunga khawvel huapa ralthuam thawn chhuah zinga 9% dawn a chawk lut a ni. A ralthuam chawk luh tamna chhan hi kum 2022-a Russia nena an indo vang a ni a, he indona vang hian Ukraine chauh ni loin Europe ram dangte ralthuam chawk luh pawh kum nga chhung hian a pung nasa hle a ni.

SIPRI report chuan Ukraine hnena ralthuam thawn lut tam ber hi US a ni tih tarlangin, Ukraine-in ralthuam a chawk luh zinga 45% chu US aṭangin a ni a, a bak ram dang 34 aṭangin a ni. Germany leh Poland aṭanga a chawk luh hi 12% leh 11% an tling bawk.

Kum eng emaw chen ralthuam chawk lut tam ber ni ṭhin, India chu khum 2020-2024 chhunga ral thuam chawk luh hi 8.3% niin Ukraine hi 8.8% a ni. Ralthuam chawk lut tam zual ram panga zingah hian Qatar, Saudi Arabia leh Pakistan an lang bawk a ni.

Kum 2020-2024 chhunga ralthuam hralh chhuak tam ber chu US bawk ni lehihn, khawvel puma ralthuam thawn chhuah zinga 43% chu US thawn chhuah a ni. Ram dang eng emaw zat ralthuam thawn chhuah a pun laiin, Russia erawh khawthlang ramten an hrek avangin hemi hun chhunga a ralthuam thawn chhuah hi 64% zetin a tlahniam a, khawvel puma ralthuam thawn chhuah zing aṭangin Russia thawn chhuah hi 7.8% chauh a ni pha. France chu ralthuam thawn chhuak tam ram pahnihnaah awmin Russia hi a rawn pel a, thawn chhuak tam ram panga zingah China leh Germany an lang bawk.