Israel-in inbiaknaa tel turin Qatar-ah palai tir dawn

Israel chuan Gaza Strip-a inkahhai puan chhunzawmna tur chungchanga inbiakna neih turah vawiin hian Qatar-ah palai a tir dawn tih a sawi. Palai hna thawktu, Egypt leh Qatar palaite chuan Hamas-te chu inbiakna neihpui tawhin, an inbiakna boruak pawh a ṭha viau niin Hamas lam chuan an sawi.

Israel prime minister Benjamin Netanyahu chuan US thlawp palai hna thawktuten inbiakna nei tura an sawmna chu an pawm tih a sawi, mahse inbiakna kalpui a nih dan tur chungchang erawh a sawi lang lo.

Israel leh Hamas hian inkahhai thawh khatna an hman zawh hnuah, a thawh hnihna neih tur chu tih khawtlai a ni a, inbiakna neih leh phawt a ngai dawn a ni. Inremna thawh khatna neih chhung khan Hamas chuan an mi hren, nungdama la awm zinga mi 25 a chhuah bakah, ruang pariat chu Israel hnenah a hlan. Israel lam hian an ram jail hrang hranga Palestinian tang zinga mi 2,000 dawn a chhuah ve bawk.

Inremna thawh hnihna kalpuina turah hian Hamas lam chuan Gaza Strip aṭanga Israel sipaite lak chhuah vek, kawngpui a dante hawn vek leh, indona avanga in leh lo chhiate din thar bakah sum lama ṭanpuina pekte a phut tel a ni.