Syria-a inbeihna thlenga thi 1,000 an chuang tawh

Syria president paihthlak tak, Bashar al-Assad a thlawptu leh sorkar sipaite inbeihna thlengah ni hnih, Zirtawpni leh Inrinni liam ta chhungin mi 1,000 chuang an thi niin Syrian Observatory for Human Rights (SOHR) chuan a sawi. Thi zinga mi 745-te chu civil mi an nih thu a sawi bawk.

Inbeihna hi kar kalta Ningani aṭanga thleng kha niin, sipaite chuan Assad-a thlawptu, Alawites hnam laka phuba lakna atan beihpui an thlak nia sawi a ni. Tuipui kam bial lamah an inbei. Assad-a roerlna hnuaiah hian Alawites te hi an dinhmun a ṭha hla a, sipai leh sorkar hna dangah pawh dinhmun sang leh pawimawh tak tak pek an ni. Assad-a paihthlak a nih hnuah sorkar thar pawhin Assad-a duhsakna nasa tak lo dawngtu an nih avangin an hnam hi a bitum chho fo nia sawi a ni.

Ni hnih chhunga inbeihnaa thi zingah hian security force mi leh sa 125 bakah, Assad thlawptu fighter 148 an tel. Syria defence ministry thupuangtu chuan security force-te beih an nih hnuah sorkar lam chuan inbeihna hmun hi a thunun tawh niin a sawi a, inbeihna thlenna bial pawhtu kawngpuite pawh khar vek a ni rih. Inbeihna thleng vang hian mi tam tak chu Lebanon ramah an tlanchhia a ni.

Syria hruaitu Ahmed al-Sharaa chuan nimin khan remna leh muanna siam a pawimawh thu sawiin, an ram mipuite inlungrual taka awm a ṭul thu a sawi.