China-in defence budget 7.2% in a ti pung dawn

China chuan venhimna lam thuam chak leh tih changtlungna turin kuminah defence budget chu 7.2% in tih pun a tum.

US dawtah China hi sipai thuam chakna tura sum seng hnem ber niin, khawvel puma Navy sipai nei ngah ber a ni mek bawk.

Defence budget tih pun tur hi China legislature annual meeting, National People's Congress-ah puan a ni a, draft budget-a an dah hi yuan trillion 1.784 (USD tld 249) a tling a ni. Hetih lai hian US leh zirchiangtu ṭhenkhat chuan China-in defence lama a sum sen hi budget a siam ai hian 40% vel aiin a la tam zawk niin an ngai thung.

Nikum khan defence budget hi 7.2% in an lo ti pung tawh bawk a, kum kua chhung chu defence budget hi single-digit in a ti pung tawh a ni. Kum 2013-a Xi Jinping a President leh commander-in-chief a nih ṭantirh khan defence budget yuan tld 720 a ni a, kum 12 hnuah budget hi yuan trillion 1.784 ah a pung chho ta a ni. Xi hian an ram sipaite thuam chak leh tih changtlunna tur chu kum 2035-ah zawh hman turin a ruahman a, heng zingah hian missile, lawnglian, tuihnuailawng leh surveillance technology thar siamna turte pawh a tel.