SKorea fighter jet-in civil chenna bialah bomb thlauh palh

South Korea Air Force fighter jet chuan nimina military exercise an neih laiin Pocheon-a civil mite chenna bialah bomb a thlauh palh a, chenna in ṭhenkhat leh biak-in a chhia a, mi 15 an hliam niin Air Force leh Fire Agency chuan an sawi. Hliam tuar zinga pahnih chu an ngaihtuahawm hle nia sawi a ni.

Pocheon hi South Korea khawpui, Seoul hmarchhak lam km 40 vela hlaa awm, North Korea nena an ramri bul hnaia awm a ni.

South Korea Air Force chuan live-fire exercise neih laiin shooting range pawn lam, civil mi chenna bialah KF-16 jet fighter pahnih aṭangin 500-pound (225kg) Mk82 bomb pariat a tla tih sawiin, he thil thlengin chhiatna a thlen leh hliam tuar an awm chu pawi an ti tak zet tih thuchhuah siamin an tarlang. Bomb pariat tlate hi an puak vek tih an sawi bawk.

Defence ministry chuan SKorea leh US sipaite chuan Pocheon-ah hian joint live-fire exercise an nei tih sawiin, kar leh aṭangin annual military drill, Freedom Shield joint drill an nei dawn a ni.