Moscow-a military parade-ah Myanmar sipai tel dawn

Russia president Vladimir Putin chuan an ram tlawhtu, Myanmar sipai sorkara hotu lu ber, senior general Min Aung Hlaing nena an inkawm hnuah, kumin May 9-a Indopui II-naa Nazi Germany hnehna champhai vawi 80-na lawmna, Moscow-a military parade neih turah Myanmar sipai an tel ve dawn tih a sawi. He hunah hian Min Aung Hlaing pawh a tel dawn tih a sawi bawk.

President Putin leh Gen Aung Hlaing te hi Thawhlehni khan Kremlin-ah an inkawm a ni. Putin chuan Gen Aung Hliang hnenah hian nikuma Russia tana sai paruk a pek vanga lawmthu hrilhin, heng saite hi Moscow sahuanah dah an ni tih a sawi. Putin chuan Russia leh Myanmar inlaichinna chuan hma a sawn zel a, nikum khan ram pahnihte insumdawntawnna pawh 40% a pungin, USD tld 2 a tling tih a sawi bawk. Kum 2021-a civil sorkar paihthlatu, Myanmar sipai sorkar thlawptu ram tlemte zingah Russia hi a tel a ni.

Putin leh Aung Hlaing te inkawm hnu hian Myanmar-a small-scale nuclear plant siamna tur inremna ziah nghal a ni. Russia state nuclear power corporation, Rosatom chuan he hna hi a thawk dawn a, 100 megawatts pe chuak thei tur a nih thu a sawi. Russia prime minister Mikhail Mishutin pawhin agriculture, nuclear energy, transport leh infrastructure amah ram pahnihte huang zauhna tur ṭha tak a awm tih a sawi a, "Russia leh Myanmar ramte hian dik lo taka hrekna hrang hrang tawk mek mah ila, kan insumdawn tawnna leh economy lama thawh dunna chuan hma a sawn zel a ni," a ti. Russia company ṭhenkhat chuan Myanmar special economic zone, Dawei-ah investment tih an tum thu a sawi.

Min Aung Hlaing hian President Putin bakah prime minister Mikhail Mishustin, Federation Council speaker Valetina Matvienko, State Duma speaker Vyacheslav Volodin leh Russian Security Council secretary Sergey Shoigu te a kawm bawk a ni.