Arab ramten Gaza din tharna turin USD tld 53 pawm

Arab ram hrang hrang hruaitute chuan Thawhlehnia Egypt khawpui, Cairo-a emergency summit an neihah, Gaza Strip din tharna atan Egypt-in USD tld 53 ruahmanna a siam chu an pawm.

US president Donald Trump-a'n Gaza Strip-a cheng Palestinian mite ram danga sawn chhuah a, US kuta Gaza Strip dah a duh chungchang a sawi chhuah hnuah, Egypt chuan President Trump ruahmanna do letna atan Gaza Strip din thar leh dan turah ruahmanna hi a siam ve nghal a ni.

Egypt president Abdel Fattah el-Sisi chuan summit-ah ruahmanna an siam hi Arab ram hrang hrang hruaituten an pawm tih sawiin, an zingah hian Qatar lal, UAE Vice President leh Saudia Arabia Foreign Minister te pawh an tel. Summit hi UN secretary-general Antonio Guterres pawhin a chhim a ni.

US leh Israel chuan Gaza Strip chungchanga Egypt ruahmanna siam chu an pawm lo tih an sawi nghal a, Hamas erawh chuan an thlawp hle thung a, legislative leh president inthlan buatsaih rawtna pawh an pawm tih an sawi.

Gaza Strip tana ruahmanna an siam, phek 112-a chhahah hian kum 2030-ah a mi chengte sawn chhuak loa Gaza Strip din tharna tur tarlan a ni. A thawh khatna chuan indona avanga thil chhia hrang hrangte thenfai a, bomb puak lo la awmte dap chhuah tum a ni a, Gaza Strip din thar hna thawh chhung hian a mi chengte awmna tur lailawk siam rawt a ni bawk. Mipui chenna tur in sak te, thlai chinna ram enkawl ṭhat bakah industrial zone leh park area lian tak tak siamin airport, fishing port leh commercial port siam tum a ni bawk. Hamas chu Gaza Strip-a an thuneihna chu sorkar lailawk kuta hlan tura tih niin, anni hian Palestinian Authority tuaitharin thuneihna a chan hma chu ro an lo rel dawn tiin an ruahmanna siamah hian an tarlang.