SKorea-in MERS hri leng a khuahkhirh tawh

South Korea Prime Minister Hwang Kyo-ahn chuan nimin khan an rama Middle East Respiratory Syndrome (MERS) hri leng chu khuahkhirh a ni tawh tih nimin khan a puang a, kar thum chuang chu hri kai thar an awm tawh lo, a ti.

Cabinet meeting-ah PM chuan he thu hi sawiin, mipuite tan pawh hlauh tur a awm tawh lo tih a sawi. MERS hri vei hmuhchhuah zinga a tam zawkte chu enkawl an nih hnuin, dahhran an nihna aṭangin chhuahtir an ni tawh tih a sawi bawk.

South Korea-ah hian May 20 khan MERS vei hmasa ber hmuh­chhuah a ni a, a hnuah mi 186 te'n he natna hri hi an kai tih hmuhchhuah a ni bawk. MERS vei zinga 36 hian a thihpui a, mahse July 12 hnu lamah he natna vanga thi hi an awm lo.

Nimin thleng khan MERS vei enkawl lai hi 12 chauh an awm tawh a, an zinga 11-te chu test an nih hnuah dam tawha ngaih an ni a, mahse pakhat erawh chu a la positive thung.

South Korea rama MERS hri hmuh a nih hian mipuite pawh a tichi-ai hle a, intihlimna leh mipui punkhawmna hmunte pawh a nghawng hle a ni. June thla chhung ringawt khan SKorea rama zin tum, ram dang khualzin 130,000 velin zin an ṭhulh phah bawk.