Russia-ah Myanmar sipai hotu a zin

Myanmar sipai sorkara hotu lu ber, Senior General Min Aung Hlaing chu nimin khan Russia-ah a zin a, Russia president Vladimir Putin a hmu dawn.

Gen Aung Hlaing hi an ram khawpui, Naypyitaw-a military airport aṭangin a thlawk chhuak a, military council member leh cabinet bakah sipai hotu ṭhenkhatin an zui a ni. Russia-a a cham chhung hian President Putin bakah official dangte pawh kawmin, ram pahnihte inlaichinna tih chak leh thawhdunna chak zawk neih dan turte a sawipui ang.

Myanmar-a civil sorkar paihthla a, sipai sorkar a din hnuah Russia leh China hi sipai sorkar thlawptu leh ralthuam pawh thawn lut nasa niin, Myanmar sipaiten beihpui an thlaknaah pawh Russia siam fighter jet an hmang a ni.

Min Aung Hlaing hian February 2021-a Myanmar-a sipaiten civil sorkar an paihthlak hnuah Russia ram a tlawh ṭum lina a ni. Kum 2022 September thla khan Russia khawchhak lam, Vladivostok-a Eastern Economic Forum-ah telin, President Putin nen pawh an inhmu a ni. Ram pahnihte hian joint military drill te an neih bakah, nuclear power siamna turah inremna an ziak bawk.