Mexico-in US-ah drug lord Caro Quintero a thawn

Mexico chuan Ningani khan US-ah ruihhlo tawlh ṭhin pawl mi leh sa an man mi 29 a thawn. An zingah hian drug lord Rafael Caro Quintero, kum 40 liam taa American agent a thah avanga US-in wanted list-a a telh pawh a tel.

US president Donald Trump chuan Mexico chu ramri kaltlanga US-a ruihhlo tawlh luh ṭhin veng zo loah a lo puh tawh a ni. US attorney general Pam Bondi chuan, "President Trump-a'n a lo sawi tawh angin, ruihhlo tawlh ṭhin pawl hi firfiak pawl an ni. Department of Justice chuan heng pawlte hi tih chhiat vek a tum a ni," tiin, pawikhawihtu an rama thawnte chu dan ang takin hrem a ni dawn tih a sawi a

Caro Quintero hi Guadalajara Cartel dintu zinga mi niin, Mexican drug-trafficking kalpuina kawngah pawh a phusa ber a ni. US sorkar chuan kum 1985-a Drug Enforcement Administration (DEA) agent, Enrique 'Kiki' Camarena nghaisak leh thah a nih kaihhnawihah man tumin a zawng a ni. Hetih lai hian Quintero hi jail-ah tangin kum 28 a tan hnuah, 2013 khan chhuah a ni a, hei hian America sorkar a ti lungawi lo hle. Mahse kum 2022-ah Mexican Navy ten an man leh a, amah pawh kum 70 a chuang tawh a, US court-ah Camarena thah thubuai a hmachhawn dawn ta a ni.

Mexico-in US-a a thawn zingah hian Zetas Cartel dintu, Miguel Angel Treviño leh a unaupa Omar Treviño te pawh an tel.