IDF-in October 7 official report hmasa ber ti chhuak

Israel sipai chuan October 7, 2023-a Hamas-in Israel chhim lam a beih chungchang zirchianna a neih hnua official report hmasa ber chu Ningani khan a ti chhuak. Hamas-te beihna avang hian Gaza Strip indona a chhuah phah a ni.

Report-ah hian Israel Defence Forces (IDF) chu Israel civil mite venghimna kawnga a mawhphurhnaah a hlawhchham a ni, tiin an hlawhchham tih pawh an pawm tih an tarlang. Hamas te pawikhawihna rapthlak tak thleng vang hia IDF chief of staff kalchhuak tur, Lt Gen Herzi Halevi chuan mawhphurhna pumhlum a lak thu sawiin, civil mite venhimna kawnga an hlawhchham avangin a hna aṭanga ban tur thu hi thla hmasa khan a lo puang tawh. Hei bakah hetianga beih an tawhna hi a thlen nawn tawh lohna turin ramri dinhmunte uluk leh zau zawka chhui chiang turin a ngen bawk.

Phek 19-a chhah report-ah Hamas mi leh sa bakah Palestinian pawl dang, mi 5,000 velin Israel hi luhchilha an beih thu leh, mi 1,200 velin nunna an chan bakah mi 251 te a man thu pawh an ziak lang a ni. October 7-a Hamas te chetna chungchangah hian intelligence lam aṭangin warning emaw, hriattirna dang engmah a awm lo a, hei vang hian Juda-te holiday a nih bawk avangin ramri venghim hna thawk tur hian sipai pawh dah belh an ni lo tih an tarlang.

Hamas hian ṭhuang ṭhumin Israel hi an bei a, a hmasa berah hian Hamas commando 1,200 vel telin mi dang hma darkar chanve velah Israel hi a lut a, a ṭhuang hnihnaah hian Hamas commando leh Palestinian pawl dang mi 2,000 velin October 7, 2023 zing dar 7 -9 inkar velah lut leh, a pathumnaa lut tam zawk hi civil mi, Hamas commander-ten a tirh luhte niin an sawi. Israel military headquarters chuan he inbeihna thlen dan chu chawhnu dar 1 velah kimchang takin an hre chauh a ni. Hamas bei lettu, sipaite bakah civil mite chu an tam tawk lo a, sipai pawh eng emaw zat an thi. October 9 zanah Israel sipaite hian border area chu an thunun pumhlum thei tih an sawi chauh a ni.

Israel hian Hamas beihna hi chhang letin, Gaza Strip chu boruak leh khawmual aṭangin a bei zui a, kumin January thla chawhnu lama inkahhai an puan hma khan ngawrh takin beihpui a thlak a ni. He indona avang hian Palestinian mi 48,000 chuang an thi tawh niin Hamas lam chuan an sawi.