NKorea-in Russia-ah sipai a tirh belh : SKorea spy agency

South Korea spy agency chuan nimin khan Russia-Ukraine indona thleng mekah Russia sipaite pui turin North Korea-in a sipai eng emaw zat a tirh belh leh niin a sawi. Heng sipaite zinga ṭhenkhat Kursk biala indona hmatawngah thawn an ni tawh niin a sawi bawk.

Kum 2024 khan North Korea hian Russia pui turin sipai 10,000 chuang a tir niin South Korea leh khawthlang ram intelligence agency-te chuan a lo sawi tawh bawk. NKorea sipaite hi Ukraine sipai do turin Kursk ramri bialah dah an ni.

Kumin January thla laihawl aṭang khan Kursk biala NKorea sipai dahte hi an indo tawh rih lo niin SKorea chuan a sawi a, Ukraine pawhin a sipai tam tak a chan hnuah he bial aṭang hian sipaite a hnukdawk tih a lo sawi tawh bawk. Mahse Ningani khan indona hmatawnga NKorea sipaite hi dah leh an ni tih sawi a ni a, hei bakah sipai thawn luh belh an awm bawk a ni tiin NKorea national intelligence agency chuan a sawi. Hemi chungchangah hian Russia leh NKorea lam chuan sawi an la nei lo thung.