Ukraine-in US nena mineral deal siam remti

Ukraine chuan a ram leilung hman dan tur chungchangah US nena inremna siam a remti tih a sawi a, Ukraine president Volodymyr Zelenskyy chu inremna ziak fel turin US-ah a zin dawn.

Russia-Ukraine indona thleng mekah US-in Ukraine sipai leh sorkar puihna tur tam tham tak a pek hnuah, US president Donald Trump chuan Ukraine chu a rama thil laih chhuah phalsak turin a nawr a ni. Trump chuan indona thlen hnuah US hian Ukraine puihna atan hian USD tld 300-500 inkar a pe tawh niin a sawi. "Kan sum pekte hi kan duh let leh a ni. America mipuite chuan an sum hmuh let leh hi an duh a ni," a ti. Ukraine president Zelenskyy chuan US thil phut hi a tih theih loh thu sawiin, "Kan ram hi ka hralh thei lo," lo ti tawh mah se, inremna siam hi an remti leh ta a ni.

Ukraine-ah hian khawvel puma raw material pawimawh leh vang zinga 5% vela awm nia chhut a ni a, electric motor-a battery siamna atana hman, graphite ton mtd 19 leh, lithium ṭhahnem tak a awm. Kum thum liam taa Russia-in a run hma khan Ukraine hian khawvel puma titanium awm zinga 7% a nei a, hei hi thlawhtheihna leh power station siamna atante an hmang a ni. Hei bakah hian metal vang tak tak pawh a nei bawk.

Russia hian Ukraine ram a luahsak mek chhungah hian ram leilung hausakna, USD tld 350 hu vel a awm niin Ukraine economy minister, Yulia Svyrydenko chuan a sawi.