Germany Chancellor thar tura beisei Friedrich Merz

Germany ram inthlanpui neih zawh takah conservative Christian Democratic Union (CDU) leh Christian Social Union (CSU) thawkdun chuan vote hmu hnem berin, vote 28.6% an hmu. An hruaitu, Friedrich Merz chu Germany Chancellor thar tura rin a ni.

Anti-immigrant Alternative for Germany (AfD) chu pahnihna niin vote 20.8% a hmu a, rorellai Social Democratic Party (SPD) chuan 16.4% chauh hmu phain pathumna a ni. Chancellor kal chhuak tur, Olaf Scholz chuan SPD chak loh chu a pawm thu leh, an chak loh chhanah mawhphurhna a lak thu a sawi.

CDU/CSU thawkdun hian Germany parliament, Bundestag-a seat awm zat 630 aṭangin seat 208 an la a, AfD in seat 152 leh SPD in seat 120 an la. Greens party in seat 85 leh The Left party in seat 64 an la bawk.

Germany Chancellor thar tura rin, CDU hruaitu Friedrich Merz hi kum 69 mi niin multimullionaire lawyer a ni. Kum 1989 khan a vawi khatna atan European Parliament-ah thlan tlin a ni a, kum 2000-ah CDU chairman a ni. Mahse Angela Merkel nen an inkar boruak ṭha lo avangin 2009 khan politics lam aṭangin private sector lamah a lut a, company hrang hrangah lawyer hna a thawk. Merkel-in politics a chawlhsan hnuah kum 2022 khan CDU hruaitu atan Merz hi thlan nawn a ni leh ta a ni. Inthlana hnehna an chang tih an hriat hnuah, Merz chuan Germany sorkar rintlak din a tum tih a sawi a, hei bakah US aṭanga Europe ram inlakhranna turin a nawr dawn tih a sawi bawk. A ngaih pawimawh ber chu Europe ramte inpumkhatna siam a ni tih a sawi a ni.