US leh Russia aiawhte Saudi Arabia-ah inbia

Russia-Ukraine indona thleng mek tih tawp dan ngaihtuahin nimin khan US secretary of state Marco Rubio leh Russia foreign minister Sergei Lavrov-te chu Saudia Arabia khawpui, Riyadh-ah an inbia.

Ram pahnih hruaitute hian indona tih tawp a nih theih dante bakah, US-Russia inlaichinna siamṭhat dante an sawi dun. An inbiakna boruak hi a ṭhat chuan US president Donald Trump leh Russia president Vladimir Putin te pawh an inhmuh ve leh thuai beisei a ni. February 12 khan President Trump chuan President Putin nen minute 90 vel phone hmanga an inbiak thu a lo sawi tawh a ni.

Riyadh-a inbiaknaah hian US palai zingah national security adviser Mike Waltz leh President Trump-an Middle East palai atana a ruat Steve Witcoff te an tel. Russia aiawh zingah hian Putin-a adviser Yuri Ushakov bakah high-ranking official dang an tel bawk.

Hetih lai hian Russia-Ukraine indona chungchanga inbiakna neihah hian Ukraine lam erawh sawm ve an ni lo thung.Ukraine president Volodymyr Zelenskyy chuan inbiaknaah sawm an nih ve loh avangin an thurel pawh an pawm ve dawn lo tih a sawi.

President Trump hian nikum December thla khan US-in Ukraine sipaite a puihna tih tlem a duh thu a lo sawi tawh a, Ukraine President Zelenskyy chuan US-in a puih chhunzawm loh chuan an hmabak a thim hle a, thla ruk vel bak an daih thei dawn lo niin a sawi. Kum 2022, February thlaa Russia-in Ukraine a run avanga indona a thlen hnuah, US Congress chuan Ukraine chhawmdawlna leh sipaite puihna turin USD tld 175 hu zet a pe tawh a ni.