Paris-ah Europe ram hruaituten meeting nei

France khawpui, Paris-ah nimin khan Europe ram hrang hrang hruaitute chuan Ukraine-Russia war thleng mek chungchangah emergency summit an nei a, Europe khawmualpui himna chunchang an sawi ho.

Meeting-ah hian ram hruaitute bakah North Atlantic Treaty Organization (NATO) hotu Marc Rutte leh European Union hotu Ursula von der Leyen te pawh an tel.

France president Emmanuel Macron chuan US president thar, Donald Trump kaihhruaina hnuaiah US-in Ukraine-Russia indona thleng mekah Ukraine a puihna tih tawp a tum thu a sawi hnuah meeting hi a ko a, US sorkar thutlukna siam hian Ukraine chauh ni lo, Europe khawmual himna thlengin a ti derthawng thei dawn niin a sawi.

Inrinni liam taa Munich Security Conference neihah khan Ukraine president Volodymyr Zelenskyy chuan US kuta an innghat thei tawh lo tih sawiin, European army siam a lo rawt tawh bawk.

US president Donald Trump-a'n kar liam taa Russia president Vladimir Putin a biak thu leh, Ukraine leh Russia inremna siamna tura hma an lak tur thu a sawi chungchangah NATO hnuaia a thawhpui, Europe ram leh Ukraine-te chuan anmahni berawn hmasa loa hetianga a kalpui hi mak an tih thu an lo sawi tawh bawk a ni. Ukraine President chuan Ukraine tel loin Ukraine chungchanga inremna chu siam theih a ni lo, a ti.