Trump leh Putin-ten inhmuh an remti

US president Donald Trump chuan Nilaini khan Russia president Vladimir Putin nen telephone-in an inbia a, Ukraine chungchang sawi turin inhmuh an remti tih a sawi.

Ram pahnih hruaitute hi darkar khat leh a chanve vel an inbia tih Russia chuan a sawi ve bawk. Hei hi US President atana Donald Trump lak luh a nih hnua an inbiak thu official-a an tarlanna hmasa ber a ni.

President Trump chuan a social media platform, Truth Social-ah President Putin nena an inbiak thu hi tarlangin, "Kan team ve ve te inbiakna neih thuai an remti a, Ukraine President Zelenskyy hnenah pawh kan inbiak chungchang hi kan hrilh ve nghal ang," tiin a sawi. Trump hian President office a luah hnuah Ukraine-Russia indona chu a tih tawp thuai tur thu a lo sawi tawh a, mahse a hma lak tum dan erawh a sawilang lo.

Ukraine-Russia indona avanga mi tam tak thihna thleng chu tih tawp an remti a, hemi atan Russia President nen hian ṭha taka thawh dun a, ram pawh intlawhtawn an remti niin Trump chuan a sawi. Putin-a thupuangtu, Dmitry Peskov pawhin Putin hian Russia tlawh turin Trump a sawm tih a sawi ve bawk.

Hetih lai hian China chuan Ukraine-Russia indona tih tawp a nih theihna tura Trump leh Putin ten inbiakna huaihawt a inhuam thu a lo sawi tawh bawk. China official-te chuan tun hnaiah Trump team hnenah rawtna hi an thlen nia tarlan a ni. Mahse Trump hian Putin nena an meeting hmasa ber hi Saudi Arabia ramah neih a nih mai theih thu a sawi thung.