NKorea-in family reunion centre a tichhia

North Korea chuan Korean War avanga chhungkua inṭhendarhte inhmuhkhawmna hmun atana hman ṭhin, South Korea sak Mount Kumang Reunion Center a ṭhiat a, South Korea-in na takin an sawisel zui .

1950-53 Korean War avang khan Korea ram hi ṭhen a ni a, chhungkaw tam tak an inṭhendarh phah a ni. Kum 1998 khan South Korea-ah hian indona avanga an chhungte nena inṭhen report hi mi nuai 1.3 vel an awm. An zinga mi 36,000 vel chu a la dam niin sorkar data chuan a tarlang.

Ram pahnihte ruahmannain chhungkaw ṭhendarhte inhmuhkhawm hun tur hi siam a ni ṭhin. Inhmuhna hun an buatsaih hmasak ber chu kum 1985-ah niin, a hnuhnung ber chu kum 2018 daih tawhah a ni. Korea ram pahnihte inkar a ṭhat loh chhoh zel avangin an chawlhsan a ni.

Diamond Mountain-a family reunion centre sak hi chhawng 12-a sang niin, room 206 a awm a, meeting neihna tur hmunte siam a ni bawk. He hmun hi inhmuhkhawmna atan kum 2009 aṭang khan an hmang ṭan a ni.

North Korea hian a hmain Diamond Mount resort-a South Korea siam hotel, golf course leh tourist facility dangte pawh a lo ti chhe tawh bawk.